YS Sharmila Slams Sakshi Newspaper: తన కుమార్తె వివాహానికి ఆంధ్రప్రదేశ్ ముఖ్యమంత్రి చంద్రబాబు నాయుడిని ఆహ్వానించడంపై సాక్షి దినపత్రిక ప్రచురించిన కథనంపై ఏపీ కాంగ్రెస్ అధ్యక్షురాలు వైఎస్‌ షర్మిల తీవ్రస్థాయిలో మండిపడ్డారు. ఒక సాధారణ పెళ్లి ఆహ్వానంలో కూడా రాజకీయ కోణాలు వెతుకుతూ, తనకు తప్పుడు సంబంధాలు అంటగట్టేలా కథనాలు రాయడం దారుణమని ఆగ్రహం వ్యక్తం చేశారు. ఈ కథనం తన వ్యక్తిత్వాన్ని మాత్రమే కాకుండా, తన కుటుంబ గౌరవాన్ని కూడా దెబ్బతీసేలా ఉందని అభ్యంతరం వ్యక్తం చేశారు. ఈ వ్యవహారంపై వైసీపీ అధినేత జగన్‌మోహన్‌రెడ్డిని నేరుగా ప్రశ్నించారు.

పెళ్లి ఆహ్వానంలోనూ వక్రభాష్యాలా: షర్మిల

తన కుమార్తె వివాహ వేడుకకు రాష్ట్ర ముఖ్యమంత్రి హోదాలో ఉన్న చంద్రబాబు నాయుడిని ఆహ్వానించడంలో తప్పేముందని షర్మిల ప్రశ్నించారు. తండ్రి వయసున్న వ్యక్తికి పెళ్లి శుభలేఖ అందిస్తే చెట్టాపట్టాలంటూ వ్యాఖ్యానిస్తారా..? ఆత్మీయ సంబంధాలకు తప్పుడు అర్థాలు ఆపాదిస్తారా..? అంటూ సాక్షి కథనంపై తీవ్ర అభ్యంతరం వ్యక్తం చేశారు. మనిషై పుట్టినవారు ఒక ఆడబిడ్డపై ఇలాంటి నిందలు వేయడం సమంజసమేనా..? సమాజం పట్ల విలువలు, మానవ సంబంధాల పట్ల కనీస గౌరవం ఉన్నవారు ఇలాంటి రాతలు రాస్తారా అని నిలదీశారు. పెళ్లి పిలుపులో కూడా రాజకీయ ప్రయోజనాలు వెతకడం సాక్షి పత్రిక దిగజారుడు ధోరణికి నిదర్శనమని విమర్శించారు.

జగన్‌కు షర్మిల సూటి ప్రశ్నలు

మహిళల పట్ల అమితమైన గౌరవం ఉందని చెప్పుకునే జగన్‌మోహన్‌రెడ్డి, తన సొంత పత్రికలో మహిళల వ్యక్తిత్వాన్ని కించపరిచేలా కథనాలు ప్రచురించడాన్ని ఎలా సమర్థించుకుంటారని షర్మిల ప్రశ్నించారు. అక్కచెల్లెమ్మలపై ప్రేమ ఉందని చెప్పే మీరు.. మీ పత్రికలో ఇలాంటి కథనాలకు ఎలా అనుమతిస్తున్నారు? ఒక మహిళపై నీలాపనిందలు వేయడమే మీ పత్రిక విధానమా..? తల్లి, చెల్లి అనే తేడా లేకుండా బురదజల్లే రాతలు రాయించడమే మీ రాజకీయ ఎజెండానా? అంటూ నిలదీశారు. తనపై, తన కుటుంబంపై వ్యక్తిత్వ హననం చేసేలా కథనం ప్రచురించినందుకు జగన్ సమాధానం చెప్పాలని డిమాండ్ చేశారు. ఈ కథనంపై జగన్ స్వయంగా వివరణ ఇస్తారా..? లేక సాక్షి పత్రికతోనే సంజాయిషీ ఇప్పిస్తారా..? అని ప్రశ్నించారు.

“గతంలో వైఎస్‌ఆర్‌ కూడా చంద్రబాబును ఆహ్వానించలేదా”

తన వాదనకు మద్దతుగా షర్మిల గతంలో జరిగిన పరిణామాలను ప్రస్తావించారు. వైఎస్‌ఆర్‌ ముఖ్యమంత్రిగా ఉన్న సమయంలో తన పిల్లల వివాహ వేడుకలకు అప్పటి రాజకీయ ప్రత్యర్థి చంద్రబాబు నాయుడిని కూడా ఆహ్వానించారని గుర్తుచేశారు. అప్పుడు వైఎస్‌ఆర్‌ చంద్రబాబుతో చెట్టాపట్టాలేసుకుని తిరిగినట్లా..? చంద్రబాబు పెళ్లిళ్లకు వచ్చి ఆశీర్వదిస్తే ఇద్దరి మధ్య రాజకీయాలకు అతీతమైన సన్నిహిత సంబంధాలు ఉన్నట్లు అర్థమా.. అని ప్రశ్నించారు. రాజకీయ విభేదాలు వేరు.. వ్యక్తిగత, కుటుంబ సంబంధాలు వేరని, వివాహాలు వంటి శుభకార్యాలకు రాజకీయాలకు అతీతంగా ఆహ్వానించడం సాధారణ సంప్రదాయమన్నారు.

యలహంక ప్యాలెస్ వివాదం.. ఇప్పుడు సాక్షి కథనంతో మరింత వేడి!

ఇదిలా ఉండగా, షర్మిల కుమార్తె అంజలిరెడ్డి వివాహ వేడుకల నేపథ్యంలో యలహంక ప్యాలెస్ వ్యవహారం కూడా గతంలో రాజకీయ చర్చకు దారితీసింది. వివాహ వేడుక కోసం ప్యాలెస్ ఇవ్వలేదన్న అంశంపై షర్మిల తీవ్ర అసంతృప్తి వ్యక్తం చేశారు. ప్రస్తుతం తాను ఇవ్వలేనంటూ వచ్చిన వ్యాఖ్యలు కూడా అప్పట్లో చర్చనీయాంశమయ్యాయి. ఇలాంటి పరిస్థితుల్లో కుమార్తె వివాహానికి చంద్రబాబును ఆహ్వానించడంపై సాక్షి ప్రచురించిన కథనం మరోసారి రాజకీయ దుమారానికి కారణమైంది. ఈ కథనాన్ని షర్మిల తన వ్యక్తిత్వాన్ని, కుటుంబ గౌరవాన్ని కించపరిచే ప్రయత్నం చేశారని మండిపడ్డారు.

సాక్షి సంజాయిషీ ఇవ్వాల్సిందే: షర్మిల

తనపై తప్పుడు అర్థాలు వచ్చేలా కథనాలు ప్రచురించడం వెనుక ఉద్దేశం ఏమిటని షర్మిల ప్రశ్నించారు. రాజకీయ విమర్శలు చేయడానికి అనేక అంశాలున్నాయని, వాటిని వదిలేసి ఒక మహిళ వ్యక్తిగత జీవితంపై బురదజల్లడం ఎంతవరకు సమంజసమని నిలదీశారు. సాక్షి పత్రిక ప్రచురించిన కథనంపై జగన్ స్పందించాలని, జరిగిన పరిణామాలపై వివరణ ఇవ్వాలని డిమాండ్ చేశారు. మహిళల గౌరవం, కుటుంబ విలువలు, మానవ సంబంధాల గురించి మాట్లాడే రాజకీయ నాయకులు తమ మీడియా సంస్థల్లో వచ్చే కథనాల విషయంలోనూ అదే విలువలను పాటించాలని షర్మిల స్పష్టం చేశారు. మొత్తంగా కుమార్తె వివాహానికి చంద్రబాబును ఆహ్వానించిన అంశం ఇప్పుడు ఏపీ రాజకీయాల్లో మరో వివాదానికి తెరలేపింది. ఒకవైపు సాక్షి కథనంపై షర్మిల తీవ్ర అభ్యంతరాలు వ్యక్తం చేస్తుండగా, మరోవైపు జగన్‌ నుంచి, సాక్షి యాజమాన్యం నుంచి ఎలాంటి స్పందన వస్తుందనేది రాజకీయ వర్గాల్లో ఆసక్తికరంగా మారింది.