Andhra Pradesh Cyclone Alert: ఆంధ్రప్రదేశ్‌కు తుపాన్ల ముప్పు మరోసారి పొంచి ఉంది. గతంలో అర్నబ్, మురసు తుపాన్ల ప్రభావం నుంచి రాష్ట్రం ఇప్పుడిప్పుడే కోలుకుంటున్న తరుణంలో.. బంగాళాఖాతంలో ఏర్పడిన అక్వాన్ తుపాను ఆందోళన కలిగిస్తోంది. ఈ తుపాను ఏపీ తీరంవైపు కదులుతుండటంతో అధికారులు అప్రమత్తమయ్యారు. రానున్న గంటల్లో తుపాను మరింత బలపడే అవకాశముందని రాష్ట్ర విపత్తుల నిర్వహణ సంస్థ వెల్లడించింది.

గంటకు 145 కి.మీ వేగంతో గాలులు వీచే ప్రమాదం

ఆగ్నేయ, నైరుతి బంగాళాఖాతంలో కేంద్రీకృతమైన అక్వాన్ తుపాను.. ప్రస్తుతం పశ్చిమ వాయవ్య దిశగా పయనిస్తోంది. గత ఆరు గంటల్లో గంటకు 3 కిలోమీటర్ల వేగంతో కదిలినట్లు అధికారులు తెలిపారు. మంగళవారం సాయంత్రానికి తీవ్ర తుపానుగా మారే అవకాశం ఉందని అంచనా వేస్తున్నారు. ఆ తర్వాత గురువారం ఉదయానికి అతి తీవ్ర తుపానుగా రూపాంతరం చెందవచ్చని పేర్కొన్నారు. ప్రస్తుతం ఈ తుపాను చెన్నైకి 610 కిలోమీటర్లు, మచిలీపట్నానికి 660 కిలోమీటర్లు, విశాఖపట్నానికి 670 కిలోమీటర్ల దూరంలో ఉన్నట్లు ఎస్‌డీఎంఏ ఎండీ ప్రఖర్ జైన్ వెల్లడించారు. వాతావరణ పరిస్థితుల నేపథ్యంలో శుక్రవారం మధ్యాహ్నం నెల్లూరు, తుని మధ్య తీరాన్ని తాకే అవకాశం ఉందని అధికారులు అంచనా వేస్తున్నారు. తీరం దాటే సమయంలో గాలుల తీవ్రత అధికంగా ఉండనుంది. గంటకు 120 నుంచి 130 కిలోమీటర్ల వేగంతో బలమైన గాలులు వీచే అవకాశముందని, కొన్ని సందర్భాల్లో గరిష్ఠ వేగం 145 కిలోమీటర్ల వరకు చేరవచ్చని హెచ్చరించారు.

అధికారులతో సీఎం చంద్రబాబు టెలికాన్ఫరెన్స్

అక్వాన్ తుపాను నేపథ్యంలో ముఖ్యమంత్రి నారా చంద్రబాబు నాయుడు అప్రమత్తమయ్యారు. మంగళవారం ఉదయం ఉన్నతాధికారులతో టెలికాన్ఫరెన్స్ నిర్వహించి తుపాను పరిస్థితులపై సమీక్షించారు. తుపాను కదలికలు, తీవ్రత, రాష్ట్రంపై ఉండే ప్రభావం గురించి అధికారులను అడిగి వివరాలు తెలుసుకున్నారు. మంగళవారం సాయంత్రానికి తుపాను తీవ్రత, దాని కదలికలపై మరింత స్పష్టత వచ్చే అవకాశం ఉందని అధికారులు ముఖ్యమంత్రికి వివరించారు. పరిస్థితులను ఎప్పటికప్పుడు పర్యవేక్షిస్తూ అవసరమైన చర్యలు తీసుకుంటున్నట్లు తెలిపారు.

ప్రజలకు ఇబ్బందులు కలగకుండా చర్యలు తీసుకోవాలి

ఈ సందర్భంగా సీఎం చంద్రబాబు అధికారులకు కీలక ఆదేశాలు జారీ చేశారు. విపత్తుల విషయంలో ప్రజలు ఆందోళన చెందాల్సిన అవసరం లేకుండా చూడాలని, ఎలాంటి ప్రాణ, ఆస్తి నష్టం జరగకుండా ముందస్తు జాగ్రత్తలు తీసుకోవాలని సూచించారు. తుపాను హెచ్చరికల నేపథ్యంలో మత్స్యకారులు సముద్రంలోకి వెళ్లకుండా కట్టుదిట్టమైన చర్యలు చేపట్టాలని ఆదేశించారు. ప్రభావిత ప్రాంతాల్లోని ప్రజలకు తుపాను సమాచారాన్ని నేరుగా చేరవేయాలని తెలిపారు. ఇందుకోసం స్వర్ణ గ్రామ, స్వర్ణ వార్డు సిబ్బంది సేవలను వినియోగించుకోవాలని సూచించారు.

విద్యుత్, రహదారుల పునరుద్ధరణకు సిద్ధంగా ఉండాలి

తుపాను ప్రభావంతో చెట్లు, విద్యుత్ స్తంభాలు కూలిపోయే పరిస్థితులు ఎదురైతే ఏమాత్రం ఆలస్యం చేయకుండా పునరుద్ధరణ పనులు చేపట్టాలని సీఎం స్పష్టం చేశారు. విద్యుత్ సరఫరా, ఇతర అత్యవసర సేవలకు అంతరాయం కలగకుండా అధికారులు ముందస్తు ఏర్పాట్లు చేసుకోవాలని సూచించారు. తుపాను ప్రభావిత ప్రాంతాల ప్రజలకు ప్రభుత్వం అండగా ఉంటుందనే భరోసా కల్పించాలని, అధికార యంత్రాంగం సమన్వయంతో పనిచేస్తూ పరిస్థితులను ఎప్పటికప్పుడు సమీక్షించాలని ముఖ్యమంత్రి చంద్రబాబు దిశానిర్దేశం చేశారు.