SIR Controversy:  కేంద్ర ఎన్నికల సంఘంలో అంతర్గత విభేదాలు మరోసారి వెలుగులోకి వచ్చాయి. సీనియర్ డిప్యూటీ ఎన్నికల కమిషనర్ మనీష్ గార్గ్ వ్యవహారశైలిపై ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి అభ్యంతరాలు వ్యక్తం చేసినట్లు సమాచారం. ఈ మేరకు వారిద్దరూ కేబినెట్ కార్యదర్శి టీవీ సోమనాథన్‌కు వేర్వేరుగా లేఖలు రాశారు. ఈ లేఖలకు సంబంధించిన కీలక వివరాలు సమాచార హక్కు చట్టం కింద వెలుగులోకి వచ్చాయి. ఎన్నికల సంఘం పరిపాలనా విభాగానికి సంబంధించి డిప్యూటీ ఈసీ భాను ప్రకాశ్ యేతురు సెలవులో ఉన్న సమయంలో, మనీష్ గార్గ్‌కు అదనపు బాధ్యతలు అప్పగించారు. ఈ క్రమంలో జూలై 28న ఆయన సీనియర్ అధికారుల మధ్య పని విభజనను మార్చుతూ ఉత్తర్వులు జారీ చేసినట్లు నివేదికలు వెల్లడించాయి. ఈ మార్పులపై ఎన్నికల సంఘంతో లేదా సంబంధిత కమిషనర్లతో ముందుగా చర్చించలేదని సంధు, వివేక్ జోషి తమ లేఖల్లో అభ్యంతరం వ్యక్తం చేశారు. ముఖ్యంగా 2023 చట్టంలోని సెక్షన్ 18కు విరుద్ధంగా ఉన్నాయని కమిషనర్లు అభిప్రాయపడ్డారు. ఈ వ్యవహారంపై తగిన చర్యలు తీసుకోవాలని వారు కోరారు.

నేను జోక్యం చేసుకోలేను: కేబినెట్ సెక్రటరీ

జూలై 29న అందిన లేఖలపై కేబినెట్ సెక్రటేరియట్ అంతర్గతంగా చర్చించింది. ఆగస్టు 4న రూపొందించిన ఫైల్ నోటింగ్స్‌లో, ఎన్నికల కమిషనర్లు వ్యక్తిగత హోదాలో రాసిన లేఖల ఆధారంగా నేరుగా చర్యలు తీసుకోవడం సముచితం కాదని పేర్కొన్నట్లు సమాచార హక్కు చట్టం పత్రాలు వెల్లడించాయి. ఎన్నికల సంఘం ఒక రాజ్యాంగ సంస్థ కావడంతో, దాని అంతర్గత వ్యవహారాల్లో కేంద్ర ప్రభుత్వం జోక్యం చేసుకుంటున్నట్లు భావించే అవకాశం ఉందని అధికారులు అభిప్రాయపడ్డారు. దీంతో కేబినెట్ కార్యదర్శి ఆగస్టు 5న ఇద్దరు కమిషనర్ల లేఖలు అందినట్లు తెలియజేస్తూ సమాధానం ఇచ్చారు. ఆ లేఖల ప్రతులను ప్రధాన ఎన్నికల కమిషనర్ జ్ఞానేష్ కుమార్ కార్యాలయానికి, DOPT అధికారులకు కూడా పంపించారు. ఇదిలా ఉంటే మనీష్ గార్గ్ జారీ చేసిన పని విభజన ఉత్తర్వులు ఇద్దరు కమిషనర్ల ఆదేశాల అనంతరం అమలు కాలేదని ఎన్నికల సంఘం గతంలో వివరణ ఇచ్చింది. ఐటీ విభాగంపై పర్యవేక్షణను డిప్యూటీ ఎన్నికల కమిషనర్ నుంచి తొలగించలేదని కూడా స్పష్టం చేసింది.

ఇండియన్ ఎక్స్‌ప్రెస్‌ కథనంలో బట్టబయలు!

ఇండియన్ ఎక్స్‌ప్రెస్‌ సెప్టెంబర్ 23న ప్రచురించిన కథనం ఎన్నికల సంఘంలో అంతర్గత విభేదాలపై దేశవ్యాప్తంగా రాజకీయ చర్చకు దారితీసింది. గత పది నెలల్లో పలు నిర్ణయాలపై ఇద్దరు ఎన్నికల కమిషనర్లు కనీసం 14 సార్లు అభ్యంతరాలు నమోదు చేసినట్లు ఆ కథనం పేర్కొంది. ఓటర్ల జాబితా సవరణ ప్రక్రియ, ఎన్నికల సమాచార సాంకేతిక వ్యవస్థకు అధికారుల ప్రాప్యత, ఫారం-6లో మార్పులు వంటి అంశాలు కూడా చర్చకు వచ్చాయి. ఈ పరిణామాలపై ప్రతిపక్ష పార్టీలు ఆందోళన వ్యక్తం చేశాయి. కాంగ్రెస్ సహా ప్రతిపక్ష నేతలు ప్రధాన ఎన్నికల కమిషనర్ జ్ఞానేష్ కుమార్ వ్యవహారశైలిని ప్రశ్నిస్తూ, ఆయన రాజీనామా చేయాలని డిమాండ్ చేశారు. ఇప్పుడు మరోసారి సమాచార హక్కు చట్టం ద్వారా వెల్లడైన పత్రాలు ఎన్నికల సంఘం అంతర్గత పరిపాలన, అధికారుల మధ్య పని విభజన, కమిషనర్ల అభ్యంతరాలపై మరిన్ని ప్రశ్నలను లేవనెత్తుతున్నాయి.