Giddalur honey trap: రోడ్డుపై వెళ్తున్నప్పుడు ఓ అందమైన మహిళ లిఫ్ట్ అడిగితే ఎవరైనా ఆగకుండా ఉంటారా..? ముఖ్యంగా పట్టపగలు, జనసంచారం ఉన్న రహదారిపై ఒంటరిగా నిలబడి లిఫ్ట్ అడిగితే చాలామంది సాయం చేయాలనే ఉద్దేశంతో తమ వాహనాలను ఆపుతారు. అయితే కొన్నిసార్లు మనం చేసే చిన్న సాయమే పెద్ద సమస్యలకు దారితీయవచ్చు. పరిచయం లేని వ్యక్తుల పట్ల అప్రమత్తంగా ఉండకపోతే హనీట్రాప్ వంటి మోసాల బారిన పడే ప్రమాదం ఉంది. తాజాగా మార్కాపురం జిల్లాలో వెలుగుచూసిన ఓ ఘటన ఇందుకు ఉదాహరణగా నిలుస్తోంది.

లిఫ్ట్ అడిగి పరిచయం.. ఆ తర్వాత అసలు కథ

మార్కాపురం జిల్లా గిద్దలూరుకు చెందిన ఓ మాజీ సైనికుడు తన బైక్‌పై వెళ్తుండగా మార్గమధ్యంలో ఓ మహిళ లిఫ్ట్ అడిగింది. ఆమెకు సాయం చేయాలనే ఉద్దేశంతో ఆ మాజీ సైనికుడు తన బైక్‌పై ఎక్కించుకున్నాడు. ప్రయాణం ప్రారంభమైన కొద్దిసేపటికే ఆమె అతడితో మాటలు కలిపింది. వ్యక్తిగత విషయాలు అడుగుతూ పరిచయం పెంచుకుంది. మీరు చాలా అందంగా ఉన్నారు.. ఏం చేస్తుంటారు..? అంటూ మాటలతో ఆకట్టుకునే ప్రయత్నం చేసింది. అంతటితో ఆగకుండా తన ఇంటికి రావాలని, తనతో ఏకాంతంగా సమయం గడపాలని ఆ మహిళ ఆహ్వానించింది. ఆమె మాటలకు ఆకర్షితుడైన మాజీ సైనికుడు పరిణామాల గురించి ఆలోచించకుండా ఆమె ఇంటికి వెళ్లాడు. అక్కడ ఇద్దరూ ఏకాంతంగా గడిపారు. అయితే ఈ వ్యవహారం వెనుక మరో కుట్ర ఉందన్న విషయాన్ని అతడు ముందుగా గుర్తించలేకపోయాడు.

కిటికీలో నుంచి వీడియో.. ఆ తర్వాత బ్లాక్‌మెయిల్

మాజీ సైనికుడు, మహిళ ఏకాంతంగా ఉన్న సమయంలో మరో మహిళ కిటికీలో నుంచి వారి వీడియోను చిత్రీకరించినట్లు బాధితుడి ఫిర్యాదులో పేర్కొన్నట్లు సమాచారం. ఇదే వీడియోను అడ్డం పెట్టుకుని అసలు బ్లాక్‌మెయిల్‌కు తెరలేపారు. ఏకాంతంగా గడిపిన తర్వాత లక్షన్నర రూపాయలు ఇవ్వాలని మహిళ డిమాండ్ చేసినట్లు తెలుస్తోంది. డబ్బులు ఇవ్వకపోతే ఇద్దరూ కలిసి ఉన్న వీడియోలను సోషల్ మీడియాలో పోస్టు చేస్తానంటూ బెదిరింపులకు దిగింది. దీంతో మాజీ సైనికుడు తీవ్ర ఆందోళనకు గురయ్యాడు. అంత మొత్తం తన వద్ద లేదని, తన ఫోన్‌పే ఖాతాలో కేవలం రూ.7 వేలు మాత్రమే ఉన్నాయని చెప్పాడు. చివరకు సదరు మహిళ అతడి నుంచి రూ.7 వేల మొత్తాన్ని ఫోన్‌పే ద్వారా బదిలీ చేయించుకున్నారు.

వేధింపులు భరించలేక పోలీసులను ఆశ్రయించిన బాధితుడు

డబ్బులు తీసుకున్నప్పటికీ మహిళ వేధింపులు ఆగలేదు. బాధితుడి ఫోన్ నంబర్ తీసుకున్న ఆమె, మరిన్ని డబ్బులు కావాలంటూ తరచూ డిమాండ్ చేసినట్లు తెలుస్తోంది. రోజురోజుకూ వేధింపులు ఎక్కువ కావడంతో మాజీ సైనికుడు తీవ్ర ఇబ్బందులు ఎదుర్కొన్నాడు. చివరకు ఈ వ్యవహారాన్ని ఇక భరించలేక గిద్దలూరు పోలీసులను ఆశ్రయించాడు. తనకు ఎదురైన పరిస్థితిని వివరించి ఫిర్యాదు చేశాడు. బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టినట్లు సమాచారం. హనీట్రాప్‌కు పాల్పడినట్లు ఆరోపణలు ఎదుర్కొంటున్న మహిళ కోసం పోలీసులు గాలిస్తున్నట్లు తెలుస్తోంది.

అపరిచితుల పట్ల అప్రమత్తంగా ఉండాలి: పోలీసులు

ఈ ఘటన నేపథ్యంలో అపరిచిత వ్యక్తులతో పరిచయాలు పెంచుకునే విషయంలో జాగ్రత్తగా ఉండాలని సూచిస్తున్నారు. రహదారిపై ఎవరైనా లిఫ్ట్ అడిగినప్పుడు మానవతా దృక్పథంతో సాయం చేయాలనుకోవడం తప్పు కాదు. అయితే వ్యక్తిగత భద్రతను కూడా దృష్టిలో ఉంచుకోవాలి. పరిచయం లేని వ్యక్తులు ఇచ్చే అనవసర ఆహ్వానాలు, వ్యక్తిగతంగా కలవాలనే ఒత్తిళ్లు, డబ్బుల డిమాండ్లు వంటి విషయాల్లో అప్రమత్తంగా ఉండాలి. అలాగే ఎవరైనా వ్యక్తిగత ఫొటోలు లేదా వీడియోలను అడ్డం పెట్టుకుని డబ్బులు డిమాండ్ చేస్తే భయపడి చెల్లింపులు చేయకుండా వెంటనే పోలీసులకు ఫిర్యాదు చేయాలి. ఫోన్ కాల్స్, మెసేజ్‌లు, చెల్లింపుల వివరాలు వంటి ఆధారాలను భద్రపరుచుకోవాలంటూ పోలీసులు సూచిస్తున్నారు. ఎదుటివారికి సాయం చేయడం మంచిదే. కానీ ఆ సాయం మనల్ని ప్రమాదంలోకి నెట్టకుండా చూసుకోవడం కూడా అంతే ముఖ్యం. హనీట్రాప్ వంటి మోసాల విషయంలో అప్రమత్తతే మనకు రక్షణ. ఒక్క క్షణం ఆలోచించకుండా తీసుకునే నిర్ణయం కొన్నిసార్లు ఆర్థికంగా, సామాజికంగా తీవ్ర ఇబ్బందులకు దారితీయవచ్చు.