తెలంగాణలో ఎన్నికలకు సమయం దగ్గర పడుతోంది. కీలక నేతలు ఇవాళ మంచిరోజు కావడంతో నామినేషన్లు దాఖలు చేశారు. తెలంగాణ సీఎం కేసీఆర్ గజ్వేల్ నుంచి బీఆర్ఎస్ అభ్యర్థిగా నామినేషన్ దాఖలు చేశారు. గజ్వేల్ ఆర్డీవో కార్యాలయంలో ఆయన నామినేషన్ పత్రాలను సమర్పించారు. గజ్వేల్‌లో కేసీఆర్ ప్రచార వాహనంలో తిరుగుతూ పార్టీ శ్రేణులకు అభివాదం చేశారు. మరోవైపు సిద్దిపేటలో మంత్రి హరీష్‌రావు సైతం నామినేషన్ పత్రాలు దాఖలు చేశారు.చెన్నూరులోని రిటర్నింగ్ కార్యాలయంలో బీఆర్ఎస్ అభ్యర్థి బాల్క సుమన్, కాంగ్రెస్ అభ్యర్థి వివేక్ నామినేషన్ పత్రాలు దాఖలు చేశారు. చెన్నూరు నామినేషన్ సెంటర్ సమీపంలో కాంగ్రెస్, బీఆర్ఎస్ వర్గాల మధ్య తోపులాట జరిగింది. కాన్వాయ్ విషయంలో ఇరు వర్గాల మధ్య వాగ్వాదం జరిగింది. పోలీసులు పరిస్థితిని అదుపులోకి తెచ్చారు. కామారెడ్డి బీఆర్ఎస్ అభ్యర్థిగా నామినేషన్ దాఖలు చేసింది కేసీఆర్‌.. అనంతరం ప్రభుత్వ విప్ ఇంటికి బయలుదేరిన సీఎం కేసీఆర్.. గంప గోవర్ధన్ నివాసంలో కామారెడ్డి ముఖ్య నేతలతో సమావేశం నిర్వహించారు. వివిధ కుల సంఘాలతో వేర్వేరుగా భేటీ అయ్యారు.