మన జీవితం డబ్బు చుట్టూ తిరుగుతుంది. డబ్బే లేకపోతే మన జీవితం క్షణకాలం కూడా ముందుకు సాగదు. జీవితంలో ఆర్థిక స్వేచ్ఛ చాలా ముఖ్యం. ఇది మనకు కావాల్సి న విధంగా జీవితాన్ని గడపడానికి అవసరమైన ద్రవ్య స్వతంత్య్రాన్ని ఇస్తుంది. జీవితంలో ఆర్థిక స్వేచ్ఛను సాధించడానికి కొంత ప్రణాళిక, ప్రేరణ అవసరం. ఆర్థిక అంశాలపై అవగాహన లేని వ్యక్తి ఏమీ పొదుపు చేసుకోలేడు. అలాగే వారి ఆర్థిక అవసరాల కోసం ఇతరులపై ఆధారపడతాడు. కాబట్టి ఒక వ్యక్తి జీవితంలో ఆర్థిక స్వేచ్ఛను పొందాలంటే ఎలాంటి జాగ్రత్తలు తీసుకోవాలని అంతా ఆలోచిస్తూ ఉంటారు. నెలవారీ బడ్జెట్‌ను సెట్ చేయడం అందరికీ మంచి ఉపయోగకరమయిన అంశం. ప్రతి నెల ప్రారంభంలో మీ కోసం ఎల్లప్పుడూ బడ్జెట్‌ను సెట్ చేసుకోవాలి. మీరు పొదుపు చేయాలనుకుంటున్న ప్రాథమిక ప్రాంతాలను పరిశీలించాలి. అలాగే అనవసర ఖర్చులను తగ్గించాలి.
లక్ష్యాన్ని నిర్దేశించుకోవడం కూడా ఎంతో ముఖ్యం. మనం, మన కుటుంబం ఆర్థిక స్వేచ్ఛను సాధించడానికి జీవితంలో ఒక లక్ష్యాన్ని కలిగి ఉండటం ముఖ్యం.కాబట్టి మీ జీవనశైలిని పరిశీలించాలి. మనం జీవితం సాఫీగా సాగడానికి ఎంత పొదుపు చేయాలనుకుంటున్నారు? మీరు పని నుండి పదవీ విరమణ చేసిన తర్వాత మీరు ఎలా ఉండాలనుకుంటున్నారు? అనే అంశాలను పరిశీలించి ఆర్థిక లక్ష్యాలను సెట్‌చేయాలి.దానికి అనుగుణంగా ముందుకు సాగుతూ ఉండాలి. అలాగే, మీరు జీవితంలో ప్రారంభంలోనే మీ డబ్బులో కొంత భాగాన్ని పెట్టుబడి పెట్టడం ప్రారంభించాలి. మీరు దీన్ని సురక్షితమైన మ్యూచువల్ ఫండ్స్‌లో లేదా ప్రభుత్వ మద్దతు ఉన్న పథకాలలో చేయవచ్చు. మీరు కొంచెం సాహసోపేతంగా ఉండాలనుకుంటే మీరు మ్యూచువల్ ఫండ్లలో పెట్టుబడి పెట్టవచ్చు.
మీ జీవితంలో ప్రారంభంలో మీ క్రెడిట్ స్కోర్‌ను ఎల్లప్పుడూ జాగ్రత్తగా చూసుకోండి. రుణాల కోసం దరఖాస్తు చేసేటప్పుడు కూడా మంచి క్రెడిట్ స్కోర్ జీవితంలో ఉపయోగపడుతుంది. మీరు ఏదైనా అవసరం కోసం ఏమైనా రుణాలు తీసుకుంటే.. ఆరుణాలను వీలైనంత త్వరగా చెల్లించాలి. ప్రత్యేకించి మీరు విద్యార్థి రుణం తీసుకుంటే వీలైనంత త్వరగా దాన్ని తిరిగి చెల్లించడానికి ప్రయత్నించాలి. ముఖ్యంగా మీరు మీ జీతం నుండి ప్రతి నెలా ఎంత పక్కన పెట్టాలో తెలుసుకోవాలి.సాధారణంగా ప్రతి రోజూ క్యాబ్‌లు లేదా ఇతర రవాణాను తీసుకున్నప్పుడల్లా మనం చాలా డబ్బు ఖర్చు చేస్తాం. అందువల్ల ప్రత్యేకంగా పనికి వెళ్లేటప్పుడు మీ రవాణా విధానాన్ని రూపొందించుకోవాలి. అక్కడ ఖర్చును వీలైనంత తక్కువగా ఉంచడానికి ప్రయత్నించాలి. ఆటోలు వాడాలి. అలాగే మెట్రో లాంటి ప్రజారవాణా సాధనాలను ఉపయోగిస్తే డబ్బులు ఆదా చేయవచ్చు. ప్రస్తుత ఆదాయ వనరు మీ అన్ని అవసరాలను తీర్చడానికి సరిపోకపోతే మీరు అదనపు ఆదాయ వనరుల కోసం వెతకాలి. లేదంటే మీకు ఎక్కువ జీతం ఇచ్చే ఉద్యోగాన్ని మీరు కనుగొనాలి. పార్ట్ టైంలో చేసే ఉద్యోగాల గురించి ఆలోచించాలి.
