విజయనగరంలో మామా–అల్లుళ్ల సవాల్‌!
Vizianagaram Political War: విజయనగరం జిల్లాలో బొత్స కుటుంబం నుంచి నలుగురు పోటీ. రెండు మండలాల నుంచి టీడీపీ తరఫున జెడ్పీటీసీగా పోటీ చేస్తున్న మజ్జి శ్రీను కుమార్తె
Botsa Family Politics: విజయనగరం జిల్లాలో స్థానిక సంస్థల ఎన్నికల సందర్భంగా కుటుంబ రాజకీయాలు ఇప్పుడు కీలకంగా మారాయి. జిల్లా పరిషత్‌ చైర్మన్‌ పదవి కోసం బొత్స సత్యనారాయణ, ఇటీవల టీడీపీలో చేరిన ఆయన మేనల్లుడు మజ్జి శ్రీనివాసరావు మధ్య పోటీ నెలకొంది. నువ్వా నేనా అన్నట్లు పోటాపోటీగా నామినేషన్లు దాఖలు చేయడంతో విజయనగరం జిల్లా రాజకీయాలు మరింత రసవత్తరంగా మారాయి. అటు మాజీ మంత్రి కిమిడి కళా వెంకట్రావు కుటుంబం సైతం తాము కూడా బరిలో ఉన్నామని సంకేతాలిస్తోంది. ఈ నేపథ్యంలో విజయనగరం జిల్లా పరిషత్‌ చైర్మన్‌ పీఠాన్ని ఎవరు దక్కించుకుంటారనే దానిపై ఉత్కంఠ నెలకొంది.
బొత్స కుటుంబం నుంచి నాలుగు నామినేషన్లు
విజయనగరం జిల్లాలో బొత్స కుటుంబానికి రాజకీయంగా బలమైన పేరుంది. 2024 ఎన్నికల్లో చీపురుపల్లి నుంచి ఓటమి పాలైన బొత్స సత్యనారాయణ.. ఆ తర్వాత స్థానిక సంస్థల కోటాలో ఎమ్మెల్సీగా ఎన్నికయ్యారు. ఇప్పుడు తన ప్రభావాన్ని నిరూపించుకునేందుకు ఒకేసారి నాలుగు మండలాల్లో వైసీపీ తరఫున తన కుటుంబ సభ్యులను జెడ్పీటీసీ అభ్యర్థులుగా బరిలోకి దించారు. ఆయన కుమార్తె బొత్స అనూష బొండపల్లి మండలం నుంచి పోటీ చేస్తున్నారు. కోడలు పూజిత గరివిడి నుంచి, సోదరి వెంకటలక్ష్మి గుర్ల మండలం నుంచి, సోదరుడి కుమారుడు చైతన్య పూసపాటిరేగ మండలం నుంచి జెడ్పీటీసీ అభ్యర్థులుగా పోటీ చేస్తున్నారు. ఒకే కుటుంబానికి చెందిన పలువురు ఎన్నికల బరిలో నిలవడంతో ఈ అంశం రాష్ట్రవ్యాప్తంగా రాజకీయ చర్చకు దారితీసింది.
కుమార్తెను బరిలోకి దించిన మజ్జి శ్రీనివాసరావు
ఇటీవల వైసీపీ నుంచి టీడీపీలో చేరిన మజ్జి శ్రీనివాసరావు సైతం తన కుమార్తెను ఎన్నికల బరిలోకి దించారు. ఆయన కుమార్తె సిరి సహస్ర టీడీపీ తరఫున జెడ్పీటీసీ స్థానానికి నామినేషన్‌ దాఖలు చేశారు. అయితే, ఆమె ఏ మండలం నుంచి పోటీ చేస్తున్నారనే విషయంలో స్పష్టత అవసరం. తన కుమార్తె తప్పకుండా జిల్లా పరిషత్‌ చైర్మన్‌ అవుతారనే హామీని పార్టీ అధిష్ఠానం నుంచి తీసుకున్న తర్వాతే ఆయన టీడీపీలో చేరినట్లు అనుచరులు చెబుతున్నారు. మరోవైపు, బొత్స సత్యనారాయణ కుటుంబం నుంచి పోటీ చేస్తున్న వారిలో ఒకరు తప్పకుండా చైర్మన్‌ అవుతారని వైసీపీ నేతలు ధీమా వ్యక్తం చేస్తున్నట్లు తెలుస్తోంది. దీంతో విజయనగరం జిల్లాలో మామ, మేనల్లుడి మధ్య రాజకీయ పోరు ఆసక్తికరంగా మారింది.
మధ్యలో ఎంట్రీ ఇచ్చిన కళా వెంకట్రావు ఫ్యామిలీ..!
ఇదిలా ఉంటే, మాజీ మంత్రి, చీపురుపల్లి ఎమ్మెల్యే కిమిడి కళా వెంకట్రావు కోడలు సైతం జెడ్పీటీసీ స్థానానికి నామినేషన్‌ దాఖలు చేశారు. ఆమె గరివిడి మండలం నుంచి పోటీ చేస్తున్నట్లు తెలిపారు. ఇక నెల్లిమర్ల టీడీపీ ఇన్‌ఛార్జి కర్రోతు బంగార్రాజు కుమార్తె చంద్రకళ భోగాపురం మండలం జెడ్పీటీసీ స్థానానికి టీడీపీ తరఫున నామినేషన్‌ వేశారు. మొత్తంగా విజయనగరం జిల్లా పరిషత్‌ చైర్మన్‌ పీఠం కోసం ప్రధాన రాజకీయ కుటుంబాల మధ్య పోటీ ఆసక్తికరంగా మారింది. జిల్లా ప్రజలు ఏ కుటుంబానికి పట్టం కడతారో తెలియాలంటే ఎన్నికల ఫలితాలు వెలువడే వరకు వేచి చూడాల్సిందే..
