నవంబర్ 19న సిద్దిపేటలో ఏం జరగబోతోంది..?

సిద్దిపేటలో రేవంత్ పర్యటన.. హరీష్‌రావు కోటలో రాజకీయ సందడి

తెలంగాణలో నవంబర్ 19వ తేదీ కోసం కాంగ్రెస్ నేతలు ఆసక్తిగా ఎదురుచూస్తున్నారు. ఇందుకు కారణం ముఖ్యమంత్రి రేవంత్‌రెడ్డి సిద్దిపేట పర్యటన. సాధారణంగా ముఖ్యమంత్రి ఏ నియోజకవర్గంలో పర్యటించినా అది ప్రభుత్వ కార్యక్రమంగానే కనిపిస్తుంది. కానీ సిద్దిపేట పర్యటనకు మాత్రం రాజకీయంగా ప్రత్యేక ప్రాధాన్యత ఏర్పడింది. ఎందుకంటే కాంగ్రెస్ ప్రభుత్వం అధికారంలోకి వచ్చిన తర్వాత ముఖ్యమంత్రి హోదాలో రేవంత్‌రెడ్డి తొలిసారిగా సిద్దిపేటకు వెళ్లనున్నారు. పైగా సిద్దిపేట బీఆర్ఎస్ కీలక నేత, మాజీ మంత్రి హరీష్‌రావు ప్రాతినిధ్యం వహిస్తున్న నియోజకవర్గం. బీఆర్ఎస్‌లో ట్రబుల్ షూటర్‌గా పేరున్న హరీష్‌రావు రాజకీయాలకు సిద్దిపేట కేంద్రంగా ఉంది. అలాంటి నియోజకవర్గంలో ముఖ్యమంత్రి రేవంత్‌రెడ్డి బహిరంగ సభ నిర్వహించనుండటంతో రాజకీయ ఆసక్తి పెరిగింది. దీపావళి పండుగ ముగిసిన తర్వాత సిద్దిపేట వేదికగా రేవంత్‌రెడ్డి ఎలాంటి రాజకీయ విమర్శలు చేస్తారన్నది ఇప్పుడు చర్చనీయాంశంగా మారింది.

సిరిసిల్లలో కేటీఆర్‌పై సంచలన ఆరోపణలు

సిద్దిపేట పర్యటనపై ఇంతటి ఆసక్తి నెలకొనడానికి ప్రధాన కారణం గతంలో సిరిసిల్లలో జరిగిన పరిణామాలే. సిరిసిల్లలో నిర్వహించిన భారీ బహిరంగ సభలో ముఖ్యమంత్రి రేవంత్‌రెడ్డి.. బీఆర్ఎస్ వర్కింగ్ ప్రెసిడెంట్ కేటీఆర్‌ను లక్ష్యంగా చేసుకొని తీవ్ర విమర్శలు చేశారు. ముఖ్యంగా కేటీఆర్‌కు హైదరాబాద్‌లో ఫైవ్ స్టార్ హోటళ్లు ఉన్నాయని, వాటి గురించి ప్రజలకు పూర్తిగా వెల్లడించలేదని రేవంత్‌రెడ్డి ఆరోపించారు. ఆ వ్యాపారాల ద్వారా కోట్లాది రూపాయలు సంపాదించారని విమర్శించారు. తెలంగాణ ఉద్యమ సమయంలో విద్యార్థులు ఆత్మబలిదానాలు చేసుకుంటుంటే.. కేటీఆర్ మాత్రం తన వ్యాపారాలను విస్తరించుకునే పనిలో ఉన్నారంటూ ముఖ్యమంత్రి ఆరోపణలు చేశారు. ఈ వ్యాఖ్యలతో కేటీఆర్ ఆస్తులు, వ్యాపారాలపై రాజకీయ చర్చ మొదలైంది. గతంలో తమ కుటుంబానికి హైదరాబాద్‌లో ఉండేందుకు సరైన నివాసం కూడా లేదంటూ కేటీఆర్ చేసిన వ్యాఖ్యలు మరోసారి చర్చకు వచ్చాయి. అయితే ముఖ్యమంత్రి ఆరోపణలపై కేటీఆర్ కూడా స్పందించారు. తనకు హోటళ్లలో వాటాలు ఉన్న విషయాన్ని ఎన్నికల అఫిడవిట్‌లోనే వెల్లడించానని స్పష్టం చేశారు. దీంతో సిరిసిల్ల సభలో మొదలైన రాజకీయ వివాదం కొన్ని నెలలపాటు చర్చనీయాంశంగా కొనసాగింది.

కేటీఆర్ తర్వాత హరీష్‌రావే టార్గెటా..?

సిరిసిల్లలో కేటీఆర్‌పై చేసిన ఆరోపణల నేపథ్యంలో ఇప్పుడు సిద్దిపేటలో హరీష్‌రావుపై ముఖ్యమంత్రి ఎలాంటి వ్యాఖ్యలు చేస్తారన్న ఆసక్తి నెలకొంది. బీఆర్ఎస్‌లో హరీష్‌రావుకు ప్రత్యేక స్థానం ఉంది. పార్టీ నాయకులను సమన్వయం చేయడం, కార్యకర్తలకు అండగా నిలవడం, రాజకీయంగా ఎదురయ్యే సమస్యలను పరిష్కరించడంలో ఆయన కీలక పాత్ర పోషిస్తారనే పేరుంది. అలాంటి హరీష్‌రావు సొంత నియోజకవర్గంలో రేవంత్‌రెడ్డి పర్యటించనుండటంతో రాజకీయ విమర్శలు ఏ స్థాయిలో ఉంటాయన్నది చర్చగా మారింది. ఇప్పటికే పలుమార్లు హరీష్‌రావుపై రేవంత్‌రెడ్డి తీవ్ర విమర్శలు చేశారు. తెలంగాణ రాష్ట్రం ఏర్పడకముందు సాధారణ చెప్పులు వేసుకొని తిరిగిన హరీష్‌రావు.. ఇప్పుడు కోట్లాది రూపాయల ఆస్తులు సంపాదించారని గతంలో ఆరోపించారు. ఈ నేపథ్యంలో సిద్దిపేట సభలోనూ హరీష్‌రావు ఆస్తుల ప్రస్తావన తీసుకొస్తారా..? సిరిసిల్లలో కేటీఆర్ విషయంలో చేసినట్లుగానే కొత్త ఆరోపణలు చేస్తారా..? లేక ప్రభుత్వ పాలన, అభివృద్ధి అంశాలకే పరిమితమవుతారా..? అన్న ప్రశ్నలు వినిపిస్తున్నాయి.

కాళేశ్వరం, మల్లన్నసాగర్ అంశాలే ప్రధాన అస్త్రాలా..?

సిద్దిపేట సభలో ముఖ్యమంత్రి రేవంత్‌రెడ్డి ప్రస్తావించే అంశాల్లో కాళేశ్వరం ప్రాజెక్టు కూడా ఉండవచ్చన్న చర్చ జరుగుతోంది. బీఆర్ఎస్ హయాంలో జలవనరులశాఖ మంత్రిగా హరీష్‌రావు ఉన్నారు. అందుకే కాళేశ్వరం ప్రాజెక్టు నిర్మాణం, ఖర్చులు, నిర్వహణకు సంబంధించిన అంశాలపై రేవంత్‌రెడ్డి గతంలో బీఆర్ఎస్ నాయకత్వాన్ని ప్రశ్నించారు. ఇప్పుడు హరీష్‌రావు ప్రాతినిధ్యం వహిస్తున్న సిద్దిపేటలోనే ముఖ్యమంత్రి పర్యటించనుండటంతో కాళేశ్వరం అంశాన్ని మరోసారి తెరపైకి తీసుకొచ్చే అవకాశం ఉందని కాంగ్రెస్ వర్గాల్లో చర్చ జరుగుతోంది. ముఖ్యమంత్రి రేవంత్‌రెడ్డి సిద్దిపేట పర్యటనలో మరో కీలక అంశం ఇందిరాగాంధీ బీమా పథకం ప్రారంభం. నవంబర్ 19న ఈ పథకాన్ని ప్రారంభించేందుకు సిద్దిపేటను వేదికగా ఎంచుకోవడం రాజకీయ వర్గాల్లో చర్చకు దారితీసింది. తెలంగాణ వ్యాప్తంగా ప్రాధాన్యత కలిగిన ప్రభుత్వ పథకాన్ని ప్రారంభించేందుకు అనేక నియోజకవర్గాలు ఉన్నప్పటికీ.. హరీష్‌రావు ప్రాతినిధ్యం వహిస్తున్న సిద్దిపేటను ఎంచుకోవడం వెనుక రాజకీయ వ్యూహం ఉందా అన్న ప్రశ్నలు తలెత్తుతున్నాయి.

రేవంత్ విమర్శలకు కౌంటర్ ఇచ్చేందుకు బీఆర్ఎస్ సిద్ధం

సిద్దిపేటలో ముఖ్యమంత్రి రేవంత్‌రెడ్డి చేసే వ్యాఖ్యలకు సమాధానం ఇచ్చేందుకు బీఆర్ఎస్ నాయకులు కూడా సిద్ధమవుతున్నట్లు సమాచారం. సిరిసిల్ల సభలో కేటీఆర్‌పై ముఖ్యమంత్రి చేసిన వ్యాఖ్యలు రాజకీయంగా పెద్ద చర్చకు దారితీసిన నేపథ్యంలో.. సిద్దిపేటలోనూ అదే తరహా విమర్శలు వస్తే ఎలా స్పందించాలన్న అంశంపై గులాబీ నేతలు సమాలోచనలు చేస్తున్నట్లు తెలుస్తోంది. ముఖ్యంగా హరీష్‌రావు వ్యక్తిగత ఆస్తులు, కాళేశ్వరం ప్రాజెక్టు, గత ప్రభుత్వ పాలనకు సంబంధించిన ఆరోపణలు వస్తే వాటికి రాజకీయంగా సమాధానం ఇవ్వాలనే ఆలోచనలో ఉన్నట్లు చర్చ జరుగుతోంది. ఇటు కాంగ్రెస్ నాయకులు ముఖ్యమంత్రి పర్యటనపై ఆసక్తిగా ఎదురుచూస్తుండగా.. అటు బీఆర్ఎస్ నాయకులు రేవంత్‌రెడ్డి ప్రసంగంపై దృష్టి సారించారు. మొత్తానికి నవంబర్ 19న జరగనున్న ముఖ్యమంత్రి రేవంత్‌రెడ్డి సిద్దిపేట పర్యటన రాజకీయ వర్గాల్లో ఉత్కంఠ రేపుతోంది.